Böyük Britaniya, Almaniya, ABŞ və Fransa İranı Atom Enerjisi üzrə Beynəlxalq Agentliyin (AEBA) Fordo nüvə obyekti ilə bağlı hesabatının dərci ilə bağlı öhdəliklərini yerinə yetirməyə çağırıb.
Baki.Media -ın oxu.az-a istinadən məlumatına görə, bu barədə ABŞ Dövlət Departamentinin mətbuat xidmətinin yaydığı birgə məlumatda deyilib.
“Biz İranı AEBA ilə hərtərəfli təminat müqavilələri ilə üzərinə götürdüyü beynəlxalq öhdəliklərə əməl etməyə və Fordoda müvafiq təminatların təmin edilməsində agentliklə tam əməkdaşlığa çağırırıq”, - deyə bəyanatda bildirilib.
Sənəddə vurğulanıb ki, onlar İranın nüvə sazişi üzrə öhdəliklərin pozulması ilə bağlı izahatını qeyri-qənaətbəxş hesab ediblər.
“İranın bu vəziyyətin səhv nəticəsində olması ilə bağlı iddiaları qənaətbəxş deyil. Biz İranın hərəkətlərini Tehranın iddiaları ilə deyil, AEBA-nın qərəzsiz və obyektiv hesabatları əsasında qiymətləndiririk”, - deyə bəyanatda bildirilib.
Sənədin müəllifləri vurğulayıblar ki, İranın Fordo obyektində zənginləşdirilmiş uran istehsalı nüvə silahlarının yayılmaması rejimi üçün əhəmiyyətli risklər daşıyır və mülki ehtiyaclarla izah oluna bilməz.
