"Demokratların namizədini dəstəkləyən respublikaçı sabiq rəsmilər hesab edirlər ki, Tramp Respublikaçılar Partiyasına xeyir deyil, ziyan gətirir, ona görə də keçmiş prezidentə qarşı mübarizə aparırlar".
Ölkə.az xəbər verir ki, bunu Qaynarinfo-ya açıqlamasında politoloq Zərdüşt Əlizadə 100-ə yaxın sabiq respublikaçı rəsminin ABŞ-da keçiriləcək noyabr seçkilərində Demokratların namizədi Kamala Harrisi dəstəkləyəcəkləri barədə bəyanatını şərh edərkən deyib.
"Tramp siyasətə gələndə Respublikaçılar partiyasının üzvü olaraq gəlməyib. Respublikaçılar Partiyası onu qəbul etmirdi. Tramp sadəcə demokratik qaydalardan istifadə edərək, Respublikaçılar Partiyasının müxtəlif ştatlarda prezidentliyə namizədlik yarışlarında iştirak etdi və qalib gəldi. Belədə, o qədər səs topladı ki, artıq Respublikaçılar ona "yox” deməyi bacarmadı. Halbuki Respublikaçılar Partiyasının başqa namizədləri də vardı. Lakin onlar praymerizdə Trampa uduzdular. Belədə, sonda Trampı dəstəkləməyə məcbur oldular. Nəticədə Tramp Respublikaçılar Partiyasından Prezident seçildi. Amma o özünü respublikaçı saymır. İndi o yenə də özünü Respublikaçılar Partiyasına sırıyıb. Nəticədə bir çox respublikaçı qərara gəlib ki, demokratları dəstəkləsinlər. Birinci dəfə onlar Demokrat Partiyasının namizədinin xeyrinə 30 milyon, indi də 56 milyon dollar toplayıblar", deyə Zərdüşt Əlizadə bildirib.
Qeyd edək ki, ABŞ-ın Respublikaçı prezidentlərinin və Konqresin keçmiş üzvlərinin administrasiyalarının 100-dən çox keçmiş əməkdaşı Demokratlar Partiyasının namizədi Kamala Harrisə dəstək məktubu göndərib. Onlar bildirib ki, bir sıra məsələlərdə Kamala Harrislə razılaşmaya bilərlər, lakin onun Ağ Evə rəhbərlik etmək üçün əsas keyfiyyətlərə malik olduğuna əmindirlər:
"Biz bir çox daxili və xarici siyasət məsələlərində Kamala Harrislə razılaşmayacağımızı gözləyirik, lakin inanırıq ki, o, Donald Trampın olmadığı şəkildə prezident kimi xidmət etmək üçün lazım olan hər şeyə malikdir. Ona görə də biz onun prezident seçilməsini dəstəkləyirik".
Keçmiş rəsmilər Trampın 6 yanvar 2021-ci ildə ABŞ Konqressindəki qiyamda iştirakına, onun Rusiya prezidenti Vladimir Putin və Çin sədri Si Szinpinə "yaltaqlığa və manipulyasiyaya meyilliliyinə", "xaotik milli təhlükəsizlik qərarlarının qəbuluna" işarə edərək, onun yenidən prezident vəzifəsinə yararsız olduğunu qeyd ediblər.
Kamala Harrisi dəstəkləyən Respublikaçılar arasında Ronald Reyqan, Corc H.V.Buş, Corc Buş və Donald Trampın özünün administrasiyalarının keçmiş rəsmiləri var. Onlara Respublikaçılar Partiyasından olan bəzi keçmiş Konqresin üzvləri də qoşulub. Məktubu imzalayanlar arasında Demokrat prezidentlər Bill Klinton və Barak Obama administrasiyalarında çalışmış keçmiş müdafiə nazirləri Uilyam Koen və Çak Heygel də var. Həmçinin Ronald Reyqan və birinci Buş dövründə MKİ və FTB-nin direktoru olmuş Uilyam Vebster, gənc Buş və Obama administrasiyaları dövründə MKİ və NSA-nın direktoru olan Maykl Hayden də məktuba imza atıb. Məktubu imzalayan keçmiş Tramp rəsmiləri arasında prezidentin keçmiş xüsusi köməkçisi Mark Harvey və daxili təhlükəsizlik katibinin keçmiş köməkçisi Elizabeth Neumann da var.
Amerikada prezident seçkiləri 2024-cü il noyabrın 5-də keçiriləcək. ABŞ-ın hazırkı prezidenti Co Baydenin Demokratlar Partiyası tərəfindən namizəd olacağı güman edilirdi. Lakin iyulun 21-də o, yarışdan çıxdığını elan edib və vitse-prezident Kamala Harrisin namizədliyini dəstəkləyib. ABŞ-ın keçmiş prezidenti Donald Tramp Respublikaçılar Partiyasından seçkilərdə iştirak edir.
