Rusiya Prezidenti Vladimir Putin fransalı həmkarı Emmanuel Makronun Qarabağla bağlı açıqlamalarını “yanlış və qəbuledilməz” adlandırıb.
Baki.Media oxu.az-a istinadən xəbər verir ki, MDB Dövlət Başçıları sammitində çıxışı zamanı Rusiya lideri bildirib ki, dünən Fransa liderinin bəzi şərhlərini oxuyanda təəccüblənib.
“Hesab edirəm ki, onların münaqişənin gedişatından anlayışları yoxdur” deyən Putin qeyd edib ki, görünür, Makron tərəflərin mövqeyi barədə məlumatsızdır:
“Ona görə də, onlar (Fransa prezidentinin bəyanatları - red.) yanlış səslənib, hətta deyərdim ki, təhrif olunub, ona görə də qəbuledilməzdir”.
“Fürsət olsa, biz bunu Fransa prezidenti ilə müzakirə edəcəyik”, - deyə Rusiya lideri vurğulayıb və əlavə edib:
“Rusiya həmişə istənilən münaqişəni, o cümlədən Qarabağ və onun ətrafındakı məsələləri səmimi şəkildə həll etməyə çalışıb”.
Qeyd edək ki, Makron Rusiya Federasiyasını “Qarabağ məsələsindən Cənubi Qafqazda sabitliyi pozmaq üçün istifadə etmək”də ittiham edib.
