Ukrayna Prezidenti Aparatının rəhbərinin keçmiş müşaviri Aleksey Arestoviç ukraynalı jurnalist Nikolay Feldmana müsahibəsində Prezident İlham Əliyevin aprelin 22-də Moskvaya səfərini şərh edərkən bildirib ki, Azərbaycan rəhbərliyi “qüsursuz oyun oynayır."
Ölkə.Az xəbər verir ki, Rusiya sülhməramlı kontingentinin Azərbaycandan çıxarılmasından danışan Arestoviç bildirib: “2020-ci il müharibəsini şərh edəndə çoxunuz məni dinlədiniz, hamı elə bildi ki, onlar getməyəcəklər, amma dedim ki, oradan çıxana qədər beş il keçməyəcək. Nə qədər vaxt keçib? Dörd. Çünki mən Azərbaycan rəhbərliyinin nə işlə məşğul olduğunu çox gözəl başa düşürdüm. Azərbaycanın daxilində bunun necə göründüyünü bilmirəm, amma onun kənardan necə göründüyünü deyə bilərəm - qüsursuz”.
Onun sözlərinə görə, Azərbaycanın məqsədinə çatacağı ona tamamilə aydın idi.
Keçmiş müşavir qeyd edib ki, Azərbaycan “daha ağıllıdır, ona görə də (Rusiya prezidenti Vladimir) Putini üstələyib və hər şeyə nail olub”: “Siz azərbaycanlıların sinfinə heyran olmalısınız”.
Arestoviç Ukraynanı rus dilinin və mədəniyyətinin sıxışdırılmasına görə qınayıb və buna misal olaraq Azərbaycanda rus məktəblərinin çoxluğunu göstərib: “Heç bir rus, ukraynalı və ya başqa millətin nümayəndəsi özünü ikinci sinif kimi hiss etmir. Heç bir səbəb göstərməyiblər, türk olublar, ruscaya qadağa qoymayıblar, öz mədəniyyətlərini inkişaf etdiriblər”.
Keçmiş müşavir bildirib ki, Ukrayna “Azərbaycana güzgüdə baxmalı və axmaq başına tava ilə vurmalıdır”.
Miri
Ölkə.Az
